Pog Ntsig Thiab Yawg Ntsig

Tus Hais: Niam Ntxhiav Tsab Vaj

Tus post: Yaj Xyooj

Thaud ov! Muaj ib tug yawg hmoob nws lub npe hu ua Yawg Ntsig. Yawg twb muaj niam hlob lawm, sis tom qab no yawg ho mus yuav tau ib tug niam yau los thiab lauj.

Los nyob nyob tom qab no, yawg 2 tug poj niam muaj ib leeg ib plab me nyuam. Muaj ib hnub Yawg Ntsig txawm yuav mus ua luam kev deb heev, yuav mus ntau hnub thiaj li yuav los txog no lauj. 


Yawg Ntsig txawm hais rau nws 2 tug poj niam tias “kuv yuav nrog lawv mus ua luam lawm kev deb nawb, neb ib leeg muaj ib plab me nyuam, kuv mus lawm yog neb leej twg yug tau tub no kuv thiaj hlub, yog leej twg yug tau ntxhais kuv yeej tsis hlub li, kuv yuav muab nrauj”.

Yawg Ntsig hais li ntawv tag, nws nyuam qhuav mus tau 3 hnub xwb Pog Ntsig Hlob yug kiag tau ib tug me nyuam tub, niag niam yau saib zoj ua ciav yog me nyuam tub, nws txawm muab nplooj ntse los qhwv kiag, nws muab coj must so rau hauv dab rau kom maum nees noj los maum nees tsis noj, nws thiaj li coj mus rau maum nyuj noj maum nyuj thiaj muab noj lawm, tab sis maum nyuj tsis xo li. Nyuam qhuav noj tau 3 hnub xwb maum nyuj yug tau ib tug nyuam heev nyuj lawm. Pog Ntsig Yau thiaj los muab kiag 2 lub qe qauj los xiab kiag niam hlob 2 lub kaum ncauj, Pog Ntsig Hlob cia li tsis txawj hais lus lawm. Niag niam yau muab niag niam hlob 2 txhais tes khi rau nraum nrab qaum lawm ces Pog Ntsig Hlob tsis paub ua dab tsi li, tsuas paub tuav cos nkaus xwb.

Yawg Ntsig mus ua luam rov los txog Yawg Ntsig nug tias “Niam hlob thiab niam yau! Neb leej twh yug tau tub? Leej twg twg yug tau ntxhais?”.

Niag niam yau txawm hais tias “kuv yug tau tus ntxhais, tab sis nws tseem hlob, hos koj niag niam hlob ces lam hais tias muaj ib niag plab me nyuam no tab sis koj lawm tav no ces yeej tsis pom yug me nyuam li las as, ntshai nws lam dag, nws tsawv duav kom koj xav tias nws mauj me nyuam lawm thiab koj thiaj xav hlub nws xwb, yeej tsis muaj dab tsi li”.

Niag txiv mus nug niam hlob los niam hlob rua ncauj uj wv xwb tsis txawj hais ib los lus li lawm. Yawg Ntsig cia li muab niag niam hlob ntaus ntaus yuav tuag, nws tsis hlub niag niam hlob li lawm lauj! Noj los tsis xav pub noj, hnav los tsis xav pub hnav, yuav pub rau noj thaum twg ces muab rau noj thaum twg ces muab ib daig niag tawv nyuj los pua rau hauv av  mam hais rau noj xwb.

Lawv nyob nyob li ntawv tau ntev lawm, muaj ib hnub Yawg Ntsig txawm coj niag me nyuam nyuj mus laij teb, Yawg Ntsig seev tias “ab! Yus tsis nco qab nqa yus tus yeeb nkab lawm, yog yus lam muaj tub no ntshai yus tus tub yuav nqa yus tus yeeb nkab tuaj lawm laud!”, niag nyuj txaig txawm siv khiav khiav los kwv tau yawg niag yeeb nkab tuaj rau Yawg Ntsig ces niag me nyuam nyuj txawm los tsev lawm.

Nyob nyob Yawg Ntsig laus laus lawm, Yawg Ntsig mus ua teb nws tseem seev tias “ab! Tshaib yus plab ua luaj no, yus lam muaj tub nqa mov tuaj rau yus noj mad!” niag nyuj txaig txawm khiav ceev ceev los ntim mov tsuag tsuag muab khuam rau ntawm niag kub nqa tuaj rau Yawg Ntsig noj. Ua li ntawv ntev, ces Pog Ntsig Yau txawm paub lauj! Pog Ntsig Yau ua txuj tsab mob, mob heev heev yuav tuag li ntag. Pog Ntsig Yau txawm hais rau Yawg Ntsig tias “Yawg Ntsig nis Yawg Ntsig! Kuv mob ua luaj no, koj sim mus ua tsawv lawm xub ntoos dub saib yog tim nyuj dub los tim npua tai os Yawg Ntsig e?”

Tag kis Yawg Ntsig nyuam qhuav mus ploj ntais lawm xwb, Pog Ntsig txawm siv sawv tsees los kho siv ntsis plaub hau tsuag tsuag, muab qab yiag los pleev ntsej muag kom dub li lub niag pob ntoos dub. Nws txawm khiav ceev tuaj nyob tom lub niag pob ntoos dub tos. Tos ib me ntsis Yawg Ntsig txawm tuaj txog, Pog Ntsig hais tias “koj yuav mus dab tsi os yawm txiv?” Yawg Ntsig teb tias “ab... Xub ntoos dub nis xub ntoos dub! Kuv niam tsev mob mob es kuv thiaj tuaj ua tsawv ntawm koj saib seb yog vim li cas kuv niam tsev yuav mob heev ua luaj no naj?” Pog Ntsig Yau teb tias “awd yog li lod? Pov koj txhuv tuaj saib!” yawg tsig pov kiag hnab txhuv mus rau, Pog Ntsig txawm mus muab kiag lub vab coj los 2 nyuag tsoov, nws hais tias “yawg! Koj niam tsev es muaj 2 lub mob nyob hauv nkawm maj nkawm ntuag, koj yuav tsum muab nkoj nkawm maj nkawm ntuag hlawv koj niam tsev thiaj li zoo”.

Yawg Ntsig teb tias “aws! Ua li ntawv los cia kuv mam rov qab mus muab hlawv kom kuv niam tsev zoo xwb”. Yawg Ntsig tig hlo rov los lawm, ces Pog Ntsig txawm khiav ceev ceev los huas nuaj Yawg Ntsig ntej, nws los pw saum txaj tos. Yawg Ntsig lawv qab los txog, niag Pog Ntsig Yau nug tias “Yawg Ntsig nis Yawg Ntsig! Koj mus ua tsawv es yog yuav ua li cas es kuv thiaj yuav zoo os?” Yawg Ntsig teb tias “kuv mus ces xub ntoos dub hais tias kom kuv los muab nkawm maj nkawm ntuag hlawv koj thiaj li zoo no, tiam sis txom txom nyem li ntshe kuv yuav tsis kheev hlawv ho” Pog Ntsig hais tias “Yawg Ntsig nis Yawg Ntsig! Mob kuv ua luaj no, koj tseem tsis muab hlawv thiab ces kuv yeej tuag xwb, muab hlawv es tsuav muaj kuv xwb los mas yawg es, tej nyuag tsoos maj tsoos ntuag ntawv kuv mam ua yeej tau os yawg!” Yawg Ntsig xav xav, nws tsawm muab los hlawv lwam lauj! Muab tsoos maj tsoos ntuag hlawv tag zoo tau ib ntus xwb.

Pog Ntsig pom tias niag txiv heev nyuj ntawv hlub hlub Yawg Ntsig, ces nws tsawm rov qab tsab mob dua thiab lauj! Ua txuj mob heev heev tau ib hnub, da da yuav tuag li ntag, nws txawm hais tias  “Yawg Ntsig! Cas kuv yuav mob ua luaj no, koj sim mus ua tsawv saib lawm xub zeb dub seb yog vim li cas os?” Yawg Ntsig teb tias “Koj niad! Yog koj mob heev hwv lawm no los yuav mus kuj mus los mas” Yawg Ntsig mus kiag lawm ces pog  ntsig yau sawv tsees kho siv khov qas kho, muab kiag qab yiag los pleev tsuag tsuag, nws khiav ceev ceev mus txoj kev ncaj, nws txawm mus nyog saum xub zeb dub nruab qaum. Yawg Ntsig nyuj nyos nyuj nyos tuaj txog, Pog Ntsig Yau ua txuj nug tias “Koj yuav mus lawm qhov twg naj yawm txiv?” Yawg Ntsig teb tias “Twb yog kuv niam tsev mob mob li es kuv yuav tuaj ua tsawv ntawm koj saib yog vim li cas no naj?” Pog Ntsig Yau hais tias “Yog li no pov koj txhuv tuaj os” Yawg Ntsig pov kiag hnab txhuv rau, Pog Ntsig Yau muab ob nyuag tsoov tas nws txawm hais tias “Yawg Ntsig koj yuav kom koj niam tsev zoo ces koj mus muab txiv nyuj txaig los ua dab, koj niam tsev yuav thiaj zoo nawb!” Yawg Ntsig teb tias “ua li os” Yawg Ntsig nyuam qhuav tig loo los lawm xwb, niag Pog Ntsig Yau txawm siv khiav khiav los huas niag Yawg Ntsig ntej lawm. Nws ua txuj los da quaj da quaj saum txaj ntag. Yawg Ntsig lawv qab los txog Pog Ntsig nug  tias “Yawg Ntsig! Koj mus ua tsawv, yog vim li cas kuv yuav mob ua luaj li os yawg?” ywg ntsig teb tias “Kuv mus saib na has nws hais tias yog muab kuv tus txiv heev nyuj txaig tua rau koj noj mas koj thiaj zoo no, niag pog lauj! Kuv tus txiv heev nyuj txaig mas kuv hlub hlub li, nws txawj txawj nqa luam yeeb tuaj rau kuv haus, nqa dej nqa mov tuaj rau kuv noj, kuv twb laus laus lawm kuv tsis muaj tub ntshai kuv yuav tsis tua ntag aud, niag pog”

Hais li ntawv tag ces niag Pog Ntsig Yau ua txuj mob heev zus heev zus quaj da quaj da yuav tuag li ntag. Pes tsawg los yuav kom muab tus txiv heev nyuj txaig tua xwb xwb li. Yawg Ntsig xav xav nws tsawm mus hu kwv hu tij tuaj, lawv thiaj mus muab tus txiv heev nyuj txaig khi rau ntawm tswg tas, yuav muab tua ua dab no lauj! Lawv tsawm rov mus noj mov lawm, niag txiv heev nyuj txaig xav xav, ntshai lawv yuav muab tuag tiag tiag, nws tsawm npug kub ntxhias rau cov niag tswg ua dam tag, nws txawm luag txoj niag hlua khiav lawm lauj! Lawm noj mov tag lawm tawm tuaj xyuas ua cas tsis niam pom niag txig heev nyuj txaig lawm. Lawv nrhiav nrhiav tsis niam tau.

Niag txiv heev nyuj txaig kiav khiav mus txog saum qaum ntuj txawm muaj ib pab niag nyuj coob coob, xeev laus cov mas tsis muaj ob tug yuav txaij li Yawg Ntsig tus. Muaj ib hnub xyeev laus saib saib nws cov nyuj, nws pom ces nws hais tias “ua cas leej twg tus nyuj txaig ntawv yuav tuaj xyaw kuv pab niv? Kuv twb tsis muaj ib tug nyuj txaig li ntawv li las!” tus nyuj txaig ntawv mas nruab hnub nws ua nyuj, hmo nyuj nws ua neeg.

Ntxawm niaj hnub tuaj saib nyuj, nws niaj hnub muab nws daim tawv nyuj pua rau nkawv pw thiab nkawv nyob ua si. Thaum nws muab nws daim tawv nyuj hle lawm ms nws zoo zoo nraug kawg li. Hmo ntuj luag tej tsaug zog tas, nws muab nws daim tawv nyuj hle khuam raum ntawm rooj nkuag, nws tawm los nrog Ntxawm pw lawm. Nws pheej nyob nyobli ntawv. Muaj ib hmos xeev laus txawm sawv los xauj, xeev laus txawm los pom ib tug hluas nraug zoo zoo nraug nrog Ntxawm pw lauj! Tsuas tias khawm khov qwb nrwb nrees xwb lauj! Xeev laus txawm soj mus soj los, soj soj tau ntau hmo, muaj ib hmos xeev laus txawm pom nws daim niag tawv nyuj khuam ntawm rooj nkuag lauj!

Muaj ib tag kis xeev laus txawm maub daim niag tawv nyuj zais lawm. Tag kis ntawv xeev laus tej tub tej nyab twb sawv los ua tshais zom zeb tuav cos cuag dab tsi lawm. Xeev laus txawm hu tias “Ntxhawm awd! Sawv los mas, swv los nrog tej nyab ua hauj lwm, txhob sawv lig lig os, kav tsij sawv!” Ntxawm thiab niag txiv heev nyuj txaig tsim dheev, niag txiv heev nyuj txaig sawv tsees mus nrhiav tawv tws rau qhov tawv tws rau qhov, tsis pom nws daim tawv nyuj li lawm, nws cia li nyob tib tug hab nuv tseg.

Xeev laus los pom xeev laus nug tis “me tub! Koj nyob qhov twg tuaj? Cas koj yuav tuaj nrog kuv Ntxawm pw qhov nov?” txiv heev nyuj txaig teb tias “ab txiv lauj! Kuv yog neeg ntiaj teb, tab sis kuv txiv yuav 2 tug poj niam, kuv txiv tus niam yau muaj ib plab me nyuam, kuv niam muaj kuv, kuv txiv yuav mus ua luam, kuv txiv hais rau nkawv tias yog nws rov qab los txog yog leej twg yug tau tub ces kuv txiv thiaj yuav, yog leej twg yug tau ntxhais ces kuv txiv yuav coj mus tua pov tseg, nws hais li ntawv tas nws nyuam qhuav mus tau 3 hnub xwb kuv niam txawm yug tau kuv yog tub, niam yau siab tsis zoo niam yau muab kuv qhwv nplooj ntse rau maum nyuj noj, maum nyuj tsis xo kuv, tau 3  hnub xwb maum nyuj yug tau kuv los, los nyob nyob kuv txiv laus laus lawm, nws mus ua teb nws tsawm seev tias nws nqhis luam yeeb kuv txawm mus nqa luam yeeb rau nws haus, kuv nqa dej nqa mov mus rau nws noj. Niam yau pomkuv hlub kuv txiv heev, niam yau txawm tsab mob. Nws hais rau kuv txiv kom kuv txiv muab kuv tua nws thiaj li zoo, ces lawv twb muab kuv khi tau lawv mus noj me ntsis mov tso lawv yuav muab kuv tua txi dab, kuv xav tias kuv yeej yuavtuag xwb, kuv thiaj li nti dim kuv thiaj khiav tuaj nrog koj nyob kom lawv tsis txhob nrhiav tau kuv mus tua rau niam yau noj, txiv thov koj tsis txhob tua kuv lauj!”

Nyob nyob xeev laus txawm hlub hlub, xeev laus hais tias “me tub koj puas yuav kuv Ntxawm, yog koj yuav no kuv muab rau koj ua poj niam” xeev laus txawm muab xeev laus tus ntxhais Ntxawm rau nyuj txaig ua poj niam. Xeev laus npaj dej npaj cawv khi nkawv tes, noj nqaij haus cawv tas. Thaum nws tau nws poj niam tag lawm, nws mam hais rau nws poj niam tias “ntxawd! Koj nyob kuv yuav rov qab mus lawm ntiaj teb, kuv yuav mus xyuas kuv txiv nawb” nws thiaj li rov qab los lauj! Nws los los yuav txog ces nws ua txuj mus yuav ib nyuag cov taub coj tuaj muag. Nws tuaj tuaj txog, nws niam thiab nws txiv nkawv tsawm mus teb lawm, tshuav niam yau nyob hauv tsev xwb. Nws txawm nug tias “niam txawd! Kuv yuav tuaj mus ua luam tab sis kuv thov so ib hmos hauv nej puas tau?” niag niam yau teb tias “haub yau! Peb tsev ti li ti thiab peb muaj muaj dab qhuas li, seb yog koj yuav so no mus so tom peb lub nyuag cooj qaib tod!” yawg hais tias “ab niam Ntxawd! Thov so ib hmo xwb” niag niam yau ntawv teb tias “kuv hais tias tsis tau thiab tsis txaus koj pw, thiab peb tsis muaj mov yug koj, koj kav tsij mus pw lawm tom peb lub cooj qaib” ces yawg thiaj mus nyob tom cooj qaib.

Ib tsam yuav tsaus ntuj, niag Yawg Ntsig thiab Pog Ntsig Hlob nkawv los txog. Nkawv pom ces Yawg Ntsig hais tias “koj tuaj los me tub! Ua cas es tsis los so hauv tsev yuav so ntawm no?” yawg tsawm teb tias “ab! Puag ta kuv tuaj txog kuv thov niam Ntxawm no, nws hais tias nej muaj muaj dab muaj qhua li thiab ti ti li, hauv nej tsev yeej tsis tau kev rau kuv os, nws thiaj li kom kuv los so ntawm qab cooj qaib no” Yawg Ntsig txawm hais tias “tsov tom poj niam ntawd tsis paub kev cai, kav tsij los pw hauv tsev, tej niag no es quav qaib quav npua ntws zaws li no yuav ua cas pw?” ces Yawg Ntsig thiaj li coj nyuj txaij los hauv tsev.

Lawv nyob nyob txog caij noj hmo lauj! Lawv noj nqaij noj mov lawv noj saum lub rooj xwb, lawv noj seem ces lawv mam muab lawv tej niag nqaij mov seem rau Pog Ntsig Hlob noj xwb. Nyuj txaig ntsia ntsia nws tsawm hais tias “ab Txiv ntxawd! Hu tus niam pog tod los nrog peb noj mov saum rooj no saib maj!” niag niam yau teb ntua tias “niag ntawv yog poj duam xwb, cia nws noj nws tod os, tsis pub nws koom rooj nrog peb” tus tub hlub hlub nws niam nws noj tsis taus mov li nws thiaj li ua txuj tsau lawm. Lawv txhob tias “ua cas nyuam qhuav nce rooj xwb koj txawm siv tsum lawm naj” nyuj txaij teb tias “twb yog kuv nyuam qhuav noj tom kev lawm, kuv tsis tshua tshaib pes tsawg”.

Tag kis kaj ntug nws thiaj thau hlo nyiaj mus yuav tau ib co lau qaib sam coj los cev kiag rau Yawg Ntsig, nws hais tias “txiv ntxawd tag kis no kuv mus yuav tau 2 tug nyuag qaib no, niam Ntxawm neb muab tua rau peb noj” Yawg Ntsig teb tias “ab cia li los mas, tuaj ua lag ua luam xwb koj so ib nyuag pkiag hauv peb xwb koj txawm yuav tua qaib rau peb noj, cia li los maj!” nyuj txaij teb tias “kuv dua kev thiab uas, kuv lam yuav me ntsis kom peb tau zaub ntxhuag mov thiaj muaj tham xwb os”.

Hau tau nqaij siav, nyuj txaij txawm dua tau dua kiag tau ib niag taig coj mus txawb kiag rau ntawm nws niam xub ntiag rau nws niam noj. Tab sis lawv tsis pub li, lawv hais tias “me tub es niag ntawm kod ces yog niag ruam xwb, txhob nqa mus rau noj, kav tsij nqa los tso saum rooj no rau peb noj xwb, yog seem no mam nqa mus rau noj os!” nyuj txaij txawm hais tias “ab! Lam pub rau noj thiab, kuv li kuv yuav pub tas sawv daws huv tib si” lawv txawm noj noj mov txog tog nws txawm qhib ncauj nug tias “txiv ntxawd! Kuv xav hais ib lo lus rau koj puas tau?” Yawg Ntsig teb tias “me tub tau kawg mas, kav tsij hais” nyuj txaig txawm hais tias “ab! Txiv ntxawd, kuv muab 3 lub txiag los yuav koj niag poj qhev ruam ntawv nrog kuv mus de zaub nyuj no, koj puas kam?” Yawg Ntsig teb tias “aub! 3 lub txiag ntshe kuv tsis kam” nyuj txaig hais tias “yog li no muab 5 lub, koj puas kam?” Yawg Ntsig teb tias “aub! Koj txawm muab 5 lub los ntshai kuv yuav tsis kam thiab” nyuj txaij hais ntxiv tias “yog li no kuv muab 10 lub, koj puas kam?” niag niam yau teb ntua tias “koj txiv! 10 lub txiag diam muag kiag los maj!” Yawg Ntsig xav xav, nws txawm hais tias “ab! Yog koj muab 10 lub no, yuav muag los muag thiab tiag, me tub” nyuj txaig npau taws heev tam sid, nws npuaj rooj ntxhias tam siv ntag, nws hais tias “10 lub 10 lub, twb yog kuv niam sav! Neb saib tsis taus kuv niam, neb muab mov tso hauv av rau kuv niam noj, neb yeej saib tsis taus nws kiag li, neb muab cov neb noj seem rau kuv niam noj xwb puas yog?” thaum ntawv ces niam yau ntshaus ntsho, hos leej txiv ces tsa suab hlo quaj, hais tsis taus ib lo lus li luaj! Niag tub hle hlo khaub ncaws, hais kiag dej los ntxuav, hle hlo khau los npuaj nws niam qhov ncauj ua rau 2 lub qe qauj poob nthav los lauj! Ces niam hlob mam pib hais hauv paus rau hauv ntsis rau Yawg Ntsig mloog tas. Hos niag biam yau cia li zaum tib tug txaj txaj muag tseg xwb. Hais hais tas, nyuaj txaig thiaj li coj nws niam mus nyob rau qaum ntuj lawm lauj!

Tshuav niag Yawg Ntsig thiab niam yau nyob xwb, Yawg Ntsig nyob nyob nrhiav nrhiav tsis tau noj, ces Yawg Ntsig txawm raws niag tub qab mus rau qaum ntuj, nws txawm mus nyob tom hav dej quaj quaj tod. Xeev laus ntxhais Ntxawm mus ce dej nws thiaj mus pom. Nws txawm rov qab los hais rau nyuj txaig tias “ab! Kuv mus ris dej, kuv pom ib tug hmoob tuaj quaj quaj tod” txiv nyuj txaig hais tias “aub! Ntshai yog kuv txiv kaj! Cia kuv sim mus saib”

Nws thiaj li khiav khiav mus saib, ua ciav yog nws txiv tiag, nws txawm hais tias “txiv koj tuaj los!” nws txawm coj leej txiv los tsev lawm.

Yawg Ntsig mus raws tau nws tus tub lawm, nws mus tau zoo noj tau zoo hnav, nws txawm tsis rov qab los ntiaj teb lawm lau! Nws tseg niag niam yau nyob ntiaj teb, niag niam yau ua tsis tau noj tau haus niag niam yau txawm lawv qab tuaj. Niag niam yau txawm tuaj nyob tom hav dej quaj quaj thiab.

Sawv ntxov Ntxawm tuaj ev dej, pom ib tug poj hmoob nyob tod nim quaj quaj, Ntxawm thiaj los hais rau nyuj txaig tias, ces nyuj txaig thiaj mus xyuas ua ciav yog niag niam yau tiag. Nws thiaj li hais tias “lawv e... ua cas yog niam yau tiag lau, tsis xav yuav niag niam yau ntawv li os, tam sim no peb tsis pom qab ua li cas lawm ces cia peb mus hu kwv hu tij tuaj tso, peb muab rooj tag rooj txuas pav khov kho tib si peb dag tias peb ua dab ua qhua lawm, peb tsis txhob pub nnws” niag tub thiaj li khiav ntsuj los cab npua, hu kwv tij tuaj muab niag npua tua noj ua tsev nrov ntshoo nrooj. Niag niam yau los dawj dawj tag los tsis tau, los dawj dawj txuas los tsis tau, niag Pog Ntsig Yau khiav los xauj lub qhov tsev twg lawv ntov kua tshuaj rau, lawv ntov ntov kua tshuaj rau niag Pog Ntsig Yau, lawv tsis pub nqaij rau noj.

Zaj dab neeg no thiaj muaj li no: cov niag niam yau siab phem phem lawv ntov tshuaj rau ces yog thaud niag Pog Ntsig Yau siab phem phem es lawv thiaj ntov rau.