Huab Tais Siab Phem Rau Cib Pheej

Tus hais: Tooj Xeeb Xyooj

Tus post: Yaj Xyooj

(Cov dab neeg ua kuv post no yog muab los ntawv cov dab neeg qub, kuv tsis tau txais kev tso cai lo ntawm tus tswv phau ntawv no, tab sis kuv xav khaws cia thiab muab cov dab neeg no nthuav tawm rau sawv daws tau paub xwb, vam tias yuav nkag siab kuv thiab).

Puag thaum ub, muaj ob niam txiv yug tau ib tug tub nkawv muab tis npe hu ua Cib Pheej. Tus tub ntawv loj txawj kawm txuj ces nkawv tso nws mus nrog luag kawm ntaub kawm ntawv lawm thiab lauj!

Nyob nyob tom qab no nws niam thiab nws txiv twb laus laus, nkawv tsis muaj dab tsi tseg rau nkawv tus tub li, ces nkawv txawm hais tias “me tub Cib Pheej! Koj nyob, koj niam wb laus laus lawm wb yuav tuag, wv twb tsis muaj dab tsi tseg rau koj, koj nyob yog wb tsis tuag los tseg yog wb tuag lawm no koj mus ua luag zog ua luag qhev hnub noj hnub hmo noj hmo nawb mog”.

Lawv nyob nyob nws niam thiab nws txiv tuag tag lawm tiag lau, nws niam thiab nws txiv tsis muaj ib yam dab tsi yuav tseg rau nws li, nws tsuas tau cev ris tsho hnav xwb.

Cib Pheej niaj hnub mus ua luag zog de zaub nyuj zaub nees, mus ua luag tej teb, nws ua ib hnub dhau ib hnub lauj! Nws nrog leej twg ua ib hnub tus ntawv pub nws noj ib pluag mov xwb, lwm tag kis nws ho mus nrog lwm tus ua nws pheej ua li ntawv, ua ua mus txog Suav Teb lauj! Huab tais sauv txawm yuav nws los ua huab tais suav qhev, nws txawm nrog huab tais suav nyob ua qhev de zaub nyuj zaub nees, huab tais sauv kuj muaj ib tug ntxhais nkauj ntxawm zoo zoo nkauj kawg nkaus thiab.

Nyob nyob tus ntxhais ntawv loj tiav niam, ces huab tais suav txawm yuav nrhiav vauv rau nws tus ntxhais lauj! Huab tais suav thiaj ua ntawv mus hu cov tub nom tub tswv huv tib si tuaj. Huab tais suav yuav muab rau tus tsam tus ho tu siab, nws tsis pom qab muab rau leej twg li lauj! Huab tais suav thiaj kom ib leeg hiab ib lub kawm, nyias ev nyias lub kawm kawm mus nyob nram tiaj. Lawv xaws ib lub pob rau ntawm, cia ntxawm nyob pem no, nws pov lub pob lawm saum ntuj yog lub pob poob los nkag leej twg lub kawm ces cia tus ntawv yuav ntxawm. Cov tub nom tub tswv ntawv ev ib leeg ib lub kawm mus nyob nram tiaj lauj!

Ntxawm tseem tab tom yuav pov lub pob xwb ua ciav Cib Pheej txawm ev ib lub kawm qaug doj qaug de tuaj txog ntawv thiab. Huab tais siab siab tsis kheev ces txawm hais rau Cib Pheej tias “Cib Pheej, koj yuav mus dab tsi?” cib pheej teb tias “twb yog nyuag yaus yuav mus hlais zaub nyuj zaub nees lawm tom teb” huab tais hais ntxiv tias “yog li no kav tsij khiav khiav muskom dhau”, cib pheej thiaj khiav khiav mus txog puag tom hav zaub, nws nyuam qhuav pib hlais zaub nyuj zaub nees xwb ua cas cia li nrov pauj rau hauv nws lub kawm, Cib Pheej txawm khiav ntsuj los xyuas ua ciav txawm pom ib lub nyuag pob khaub hlab nyob hauv nws lub kawm, tab sis mas cib pheej yeej tsis paub tias yog dab tsi li? Cib Pheej txawm hlais tsuag tsuag zaub nyuj zaub nees tas nws muab ntim tsuag tsuag ces tig hlo los tsev. Nws khiav khiav los txog nws thau zaub nyuj zaub nees tas nrho nws txawm hais tias “aub! txiv huab tais xyo no ntshai yuav ua npog xwb lau!” txiv huab tais teb tias “yog ua li cas thiaj yuav ua npog?” Cib pheej teb tias “xyov ua cas txhia niaj txhia hnub kuv mus hlais zaub nyuj zaub nees tsis zoo li hnub no, ua cas hnub no kuv mus hlais zaub nyuj zaub nees, kuv nyuam qhuav mus txog pug tom hav zaub xwb, kuv txo kiag kuv lub kawm rau pem toj kuv hlais zaub nyuj nram hav kuv txawm hnov nrov pauj hauv kuv lub kawm tuaj kuv khiav ntsuj mus xyuas ua cas txawm pom ib lub pob khaub hlab nyob hauv kuv lub kawm, xyo no ntshai yuav ua npog xwb lau txiv huab tais!”. Huab tais txawm tsis teb li cas, hos niam huab tais txawm hais tias “koj txiv, ntshai nkawv yeej los ua niam txiv thiaj zoo li ntawv laiv!”. Txiv huab tais teb tias  “tej nyuag dog dig li ntawv es yuav muaj dab tsi”.

Txiv huab tais chim siab heev lau! Nws txawm caij nees ntws lawm lauj! Niam huab tais nyob hauv tsev nws cia li muab ntxawm txis rau Cib Pheej lawm. Cib Pheej thiaj coj ntxawm mus nyob nram nws lub nyuag tsev nplooj tsawb, nkawv mus nyob nrav, ntxawm txawm hais rau cib pheej tias “cib pheej koj mus qiv niam thiab txiv nkawd peb lag nyiaj peb lag kub los rau wb chiv peev ua neej yuad!”

Cib pheej txawm mus qiv tau peb lag nyiaj peb lag kub nram niam tais yawm txiv los rau nkawv chiv peev ua neej lawm. Nkawv los nyob tau ob peb hnub nkawv txawm yuav rov qab mus xyuas niam tais yawm txiv no tab sis yawm txiv tseem tsis tau los. Chib pheej nkawv nrov niam tais nyob nyob nkawv yuav rov los tsev, cib pheej txawm mus hlais zaub rau yawm txiv lawv cov nees noj. Nws mus txog ntawm ib tug choj loj loj chib pheej ntsia na ha pom txiv huab tais caij nees ntws los lauj! Tsuas tias pom plua tshauv ncho lug ncho lug los, chib pheej xav khiav los khiav tsis yeej lawm. cib pheej txawm mus nkaum hauv taw choj. Txiv huab tais caij nees ntws los txog ntawm tus taw choj nees nres kiag ntawv lauj! Txiv huab tais ntaus nees npaum cas los nees tsis kam mus li lawm ntag, txiv huab tais thiaj li nqis plhuav, muab nees khi kiag mus xauj seb muaj dab tsi cas nws tus nees yuav tsis kam mus lawm? nws yib xauj hauv qab coj no ua ciav pom cib pheej zaum tib tug niag qhov muag ntsais duj doov hauv qab choj tuaj. Txiv huab tais cem tias “nyuag cib pheej dev koj tuaj nyob dab tsi li kod no? vim koj nyob hauv qab choj koj es kuv tus nees thiaj tsis kam mus, kav tsij tawm los tam sim no!” cib pheej thiaj tawm tib tug ntsoos ntsoos hauv los, nws los txog ntua xwb nws tsa loo tes hawm, nws hais tias “aub txiv huab tais lauj! Koj tuaj lawm ces niam huab tais twb muab ntxawm txis rau kuv lawm, ntxawm wb thiaj tuaj qiv tau peb lag nyiaj peb lag kub los rau wb chiv peev ua neej no, kuv mus txiav zaub nees los mam los qiv no” txiv huab tais tsis txaus siab, nws rho hlo ntaj tib ntag cib pheej caj dab muab cib pheej pov kiag rau hav dej lawm, tus dej mas ceev ceev kawg li tsuas tias ntws nrov sis xwb. Txiv huab tais caij nees ntws los lawm lauj!

Huab tais los txog ntua, ntxawm sawv ntawm qhov rooj, ntxawm nug tias “txiv koj los koj puas pom cib pheej naj?” txiv huab tais teb tias “kuv pom kawg los mas, niag cib pheej dev ntawv kuv los txog nram niag choj nrad nws cav khiav nkaum hauv qab choj, kuv los txog ntawv kuv tus nees tsis kam los li kuv thiaj nqis mus xauj ua ciav yog niag cib pheej dev nws nyob tib tug qhov muag ntsais pluj plias hauv kuv thiaj li hu tawm los, kuv muab ntaj txiav ppov hauv qab choj lawm”.

Ntxawm quaj dhev tam sim ntawv, ntxawm khiav khiav tuaj mus xyuas ua cas tsawm pom cib pheej lub cev kiv kiv hauv hav dej, hos lub tau hau kiv kiv saum nplaim dej, nws lub taub hau yeej tsis ntub dej li. Ntxawm thiaj mus npo tau los saum choj ntxawm mas quaj tas zog li lauj! Ntxawm txawm seev tias “ab! Lam mauj leej twg tsa tau kuv txiv cib pheej sawv ntshe kuv yuav nco ntsoov nws mus tag ib sim neej tsis muaj hnub nrauj nws tseg li lauj!” ib me ntsis txawm muaj ib tauv huab poob nthav tim taw choj tawg dawb vog, ntxawm pheej quaj quaj taub hau nyo nyes xwb, txawm siv hais zoj ntawm ntxawm nrob raum tuaj tias “ntxawm vim li cas koj ho quaj os?” ntxawm thiaj li lem hlo mus saib ua cas muaj ib tug hluas nkauj zoo zoo nkauj nyob ntawv thiab ntxawm thiaj teb tias “kuv txiv nws siab phem nws muab kuv tus txiv cib pheej txiav caj dab pov hauv hav dej no, kuv tuaj npo tau es kuv thiaj quaj xwb” tus ntxhais ntawv hais tias “ntxawm koj seev hais tias yog leej twg pab tsa tau koj tus txiv cib pheej no koj yuav nco nws tshav ntuj mus ib sim no puas yog?” ntxawm teb tias “yog leej twg pab tau mas kuv yuav nco nws tshav ntuj mus ib sim tiag” tus ntxhais ntawv hais tias “yog no kuv pab seb puas tau” tus ntxhais ntawv thiaj muab lub taub hau los twb rau, muab kiag kuab moj tsuas coj los tsuag kiag tas nrho, ib pliag rov tsuag kiag rau thiab, nws tsuag peb zaug ces cib pheej sawv tsees. Cib pheej hais tias “aub! ua cas kuv lam pw ntawm niag taw choj no ne?” ntxawm thiaj hais tias “twb yog kuv txiv muab koj tua pov hauv niag dej no es kuv tuaj npo tau koj kuv quaj quaj kuv seev seev tias yog leej twg pab tau koj sawv rov los mas kuv yuav nco nws tshav ntuj mus ib sim neej no es tus niam hluas no nws thiaj tuaj tsa tau koj sawv rov qab los lawm mas cib pheej”. Tus ntxhais ntawv yog ib tug ntxhais qaum ntuj kav txheej huab saud, nws hais rau cib pheej tias “cib pheej kuv pab tau koj lawm neb puas nco kuv tshav ntuj mus ib sim neej os?” cib pheej teb tias “aub! koj pab tau kuv lawm kuv yeej yuav nco koj tshav ntuj mus tag ib sim neej xwb mas” ces tus ntxhais qaum ntuj ntawv txawm taug kev mus rau tim hav zoov lawm.

Chib pheej thiab ntxawm nkawv txawm los rau nram nkawv lub nyuab tsev nplooj tsawb, txiv huab tais cov niag tub mab tub qhe pom lawv qw zom zaws tias “Aub! txiv huab tais lau cib pheej rov qab los lawm”. txiv huab tais hais tias “cas yuav dag tag npauv! Kuv twb muab nws tua lawm ned, kuv twb xuas ntaj txiav nws caj dab pov hauv hav dej lawm nws yeej sawv tsis tau ib zaug li os!” lawv qw zom zaws hais tias “txiv huab tais sawv lawm tiag hos, nkawv twb los rau nram tsev lawm”. txiv huab tais tsis ntseeg li ntag, nws thiaj hais kom nws tus tub hlob mus xyuas tab sis nws tsis kam mus, thiaj kom tus tub ntxawg mus, tub ntxawg ya ntxiag tuaj txog ua cas cib pheej los lawm tiag, nws thiaj khiav khiav los hais rau nws txiv tias “txiv nws sawv rov los lawm tiag hos” huab tais hais tias “yog li mas tsis txaus siab li ntag, tub hlob thiab tub nrab neb cia li caij nees mus muab cib pheej tsaws rau saum nees es coj mus pov tseg rau tom hav zoov kom tsov muab tom noj”

Tag kis sawv ntxov noj tshais tas nrho, ob kwv tij tso kiag nees tom nkuaj ces sam nees ntws tuaj txog tom cib pheej lub tsev, nkawv hais tias “cib pheej koj los saum nees no, kuv txiv tias kom koj nrog wb caij nees mus no!” cib pheej thiaj sam plaws rau saum tus tub hlob tus nees, nkawv nplawm nees ntws lawm lauj! Nees khiav khiav mus txog pug tom plawv zoov, tsuas hnov tsov hov khaus nrov nrij nrawj qab ke qaum kev tuaj xwb, plawm tw pig poog quaj mlig mlaug qhov txhia chaw. Nkawv lem hlo nees ces cia li muab cib pheej thawb ntiag rau hauv av nkawv cia li tuam phov ntws lo lawm lauj!

Cib pheej ntshai ntshai nws lam vuag ub vuag no qi muag nti vuag rau ub rau no, nws vuag vuag ua ciav txawm vuag tau ib txoj hlua nees thiab, nws saib zoj ua ca yog tib tug txiv nees nyob ntawd, cib pheej muab hlua nees faib hlo nws sam plhaw rau saum nees nruab qaum nplawm nees ntws lawv qab thiab lauj! Ua cas cib pheej tus nees ceev zus ceev zus huas kiag tau nkawv ntej lawm thiab lauj! Huab tais tus tub hlob hu tias “cib pheej tos me ntsis hais koj tso” cib pheej nres kiag nees tos ces nug tias “neb muaj lus dab tsi yuav hais rau kuv” nkawv teb tias “wb tsis muaj lus dab tsi thiab, tab sis koj caij wb ob tug tso wb caij koj tus nawb” cib pheej teb tias “thaum tuaj neb twb caij neb ob tug tsam no nyias caij nyias tus os” cib pheej caij nees ntws los lawm lauj! Ua ca cib pheej tus nees ceev zuj zus ceev zuj zus ces cia li ya plaws saum ib nta ntuj lawm lauj! Tus nees ya mus txog ntua saum txheej huab cib pheej txawm hnov nyhav zog nram caj tw tuaj ces txhawm hnov hais lus rau cib pheej tias “cib pheej koj puas nco kuv tas ib sim neej los tsis nco?” cib pheej teb tias “aub! tsam no kuv ntxhov siab lawm, kuv tsis nco li lawm nawb, ua li koj yog leej twg?” nws txawm teb tias “yog li no kuv yuav koj los pob” cib pheej teb tias “yuav los tau kawg, tab sis tshuav niam hlob nev?” nws teb tias “niam hlob ces cia wb mus nyob muaj chaw tso mam rov qab los tos xwb!” cib pheej nug tias “ua li koj yuav mus lawm qhov twg?” nws teb tias “tam sim no tsis paub li, taub hau nees ncaj twg ces mus twg xwb” ces tus nees txawm ya ya mus tsaws ntua rau ceeb tseej teb lawm lauj!

Cib pheej nyob nyob plaub hau twb pib dawb lawm lauj! Tshauv ntxawm nyob tom qab mas ntxawm txom nyem kawg li, dab tsi los tsis muaj niaj hnub quaj seev nco txog cib pheej xwb. Mov los tsis muaj noj tsev los tsis muaj nyob, nws mus nrog qaib nrog npua sib txeeb noj sib txeeb pw.

Cib pheej nkawv nyob nyob muaj ib hnub txawm muaj ib tug noog ya los tsaws ntawm qhov rai txawm los nyob ntawv quaj. Cib pheej poj niam los hais rau nws tias “cib pheej! Koj mloog seb tus noog ntawv quaj li cas? Nws quaj muaj lus tseem ceeb hos” cib pheej mloog zoj ua ciav quaj quaj tiag, cib pheej hais tias “niag noog ntawv niam yuav quaj muaj lus tseem ceeb dab tsi na, nws ham tsis quaj nrij nroj loj! Nrij nroj loj no xwb las mas” nws poj niam hais tias “koj sim mloog zoo zoo seb mas nws yuav quaj li ntawv nab!”cib pheej rov mloog zoj nws rov hais li qub thiab, nws poj niam thiaj hais rau nws tias “koj sim mloog zoo zoo seb maj tus noog ntawv quaj hais tias cib pheej koj nco tom ntej koj tsis nco tom qab sav koj sim ua zoo mloog zoo zoo seb nws quaj li ntawv tiag” cib pheej thiaj mloog zoj ua cas quaj li ntawv tiag lauj! Nws thiaj nco dheev txog tias tshauv ntxawmnyob tom qab, cib pheej thiaj seev tias “ntuj aw! Tshuav kuv niam hlob nyob tom qab sav, ntshe nws nyob nws txom txom nyem es tus noog ntawv thiaj li quaj rau kuv li ntawv tiag lauj!”

Cib pheej thiaj los ntaus tau peb hnub peb hmos ntaj ces ntaus tau ib rab ntaj, ces los hov tau peb hnub thiab, cib pheej txawm xav tias “ab! Yog kuv hov tau rab ntaj no mas kuv muab niag niam yau no tua kiag pov tseg, kuv mam mus nrog kuv niam hlob nyob ntshe yuav zoo tshaj, cas kuv yuav tsis nco txog nws li lawm” nws niam yau twb paub ua ntej lawm, nws los txog ntawm cib pheej nws hais tias “cib pheej koj hov ntaj ua dab tsi?” cib pheej teb tias “ab! Kuv lam hov xwb as!” nws niam yau hais tias “yog tsis muaj ib yam hauj lwm tseem ceeb koj yuav tsis hov rab ntaj no?” cib pheej hais tias “kuv twb tsis hov ua dab tsi nev, kuv yeej tsis xav li cas, kuv lam hov kom ntse wb thiaj tau siv xwb” ces nws poj niam thiaj hais tias “cib pheej koj tsis txhob xav li ntawv maj, qhov kuv nug koj yog koj hov tau rab ntaj no koj yuav muab kuv txiav pov tseg koj mam rov qab mus yuav koj niam hlob no, tab sis kuv hais rau koj tias yog koj tseem muab kuv tua lawm thiab ces koj kawg tuag xwb, koj tsis txhob xav li ntawv, yog koj yuav mus koj ua zoo hais kuv yuav pab koj kom koj mus yooj yim tsis nyuab” cib pheej thiaj teb tias “aub! Kuv tau hais lawm tiag yog li no thov koj pab kuv lauj!” ces nws niam yau thiaj hais rau nws tias cib pheej kuv muab ob lub quav txhuas no rau koj, yog koj mus txog lawm koj muab ob lub quav txhuas no sib txhuam hu kuv, kuv mam tuaj txo dej txo cawv rau neb nawb mog”

Cib pheej mus txo phluav nees tom nkuaj sam plaws saum nees nruab qaum, ces nees ya plho los txog ntua, nws ntaus tsuag tsuag tau ib lub nkuaj zeb nkauj tsua kaw kiag nws tus nees. Cib pheej txawm los los txog ntawm ib lub tshav nplej, txawm muaj ib tug poj hmoob nyob ntawd quaj quaj kua muag kua ntswg ntws lug, qhov muag o wv xwb lauj! Cib pheej txawm nug tias “leej muad! Ua cas koj yuav quaj tas npaum kod? Yog vim li cas?” tus poj hmoov ntawd teb tias “ ab! Leej yawm dab kuv lam quaj xwb os, cav tsis muaj dab tsi” cib pheej rov nug tias “ab! Leej muam cas es koj quaj, koj qhia rau kuv saib tej zaum kuv pab tau koj laiv” tus poj hmoob ntawv txawm teb tias “ab! Tham tham qhia koj los ntshe koj yuav pab tsis tau ces tsis tham” cib pheej tias “ab lam tham tsam kuv ho pab tau laiv” niag pog hmoob ntawv thiaj hais tias “ab! Yog koj hais li no yuav tham los tham tiag, tos kuv niaj hnub quaj los vim thaud kuv txiv huab tais yug tau kuv ib tug xwb, kuv hlob tiav niam kuv txiv yuav nrhiav txiv rau kuv, nws txawm hu kaum ob lub teb chaws kaum ob tug tub nom tuaj. Nws yuav muab kuv rau tus los ntshai lwm tus yuav tu siab, nws thiaj kom lawv ib leeg ev ib lub kawm mus nyob nram tiaj es kuv nyob pem tsev no pov lub pob mus yog poob rau leej twg lub kawm ces tus ntawv yuav kuv, tab sis kuv txiv muaj ib tug tub qhev nws lub npe hu ua cib pheej no, nws txawm ev ib lub kawm tuaj muaj de zaub nyuj zaub nees, thaum kuv pov lub pob rau saum ntuj cas tsis nkag cov tub nom tub tswv ntawv leej twg lub li, tab sis ho mus nkag cib pheej lub kawm tom teb, nws tsis paub dab tsi li nws txawm los qhia rau kuv txiv, kuv txiv tsis txaus siab, nws tseem yuav mus hu cov tub nom tuaj xaiv dua no tab sis kuv niam ho muab kuv rau cib pheej ua ntej lawm, muaj ib hnub kuv txiv los ntsib cib pheej rau hauv qab choj kuv txiv muab cib pheej txiav caj dab pov hauv hav dej, kuv mus npo tau kuv quaj quaj kuv seev seev tias yog leej twg pab tau kuv tsa kuv txiv cib pheej rov sawv los ua neeg dua kuv yuav nco nws tshav ntuj mus ib txhis, txawm muaj ib tug ntxhais los tsa tau nws sawv, cib pheej twb rov qab los pw ib hmos, tag kis kaj ntug kuv txiv kom kuv tus nus hlob thiab nus nrab tuaj coj cib pheej mus rau tsov tom, txij thaum ntawv los tsis pom cib pheej los li lawm, xyov puas yog tsov tom lawm los? Los yog nws khiav dim lawm? tsis pom nws los txog tav li no, kuv txiv lawv los tsis yuav kuv lawm thiab, kuv txom txom nyem tsis muaj dab tsi noj tsis muaj dab tsi hnav, kuv ces nrog dev npua sib huas noj xwb, kuv thiaj tuaj yawm luag tej nplej uas luag yawm tsis tag no coj mus ua noj xwb, kuv tuaj txog ntawm no kuv nco nco kuv txiv cib pheej es kuv thiaj li quaj quaj li no, koj  puas paub tus ntawv naj leej nus? Kuv lam piav li no xwb, kuv piav tas los ntshai koj yuav pab tsis tau kuv ib zaug li” cib pheej txawm teb hais tias “ab! Yog tus hu ua cib pheej no tej zaum kuv paub kawg” tus poj hmoob ntawv txawm ntsia cib pheej nruj nruj ua ciav pom cib pheej lub kua muag los ntws nto, nws thiaj li sawv tsees los khawm lias cib pheej ces nkawv sib qawg quaj sib qawg nws lau! Tsuas tias koj plhw kuv kuv plhw koj, zoo zoo lub siab kuag muag ntws sis. Nkawv txawm rov qab los tsev lauj! Los txog tom lub tsev nplooj tsawb, qhov chaw qub ua nkawv ib txwm nyob pom hav tsawb nplog luas fab li fab lawm xwb.

Cib pheej thiaj rho hlo ob lub nyuag txhuas coj los sib txhuam cib pheej hu tias “aub! kuv niam yau qaum ntuj lau! Kuv tuaj txog lawm koj tuaj txo dej txo cawv rau kuv lauj!” nws niam yau thiaj ya plaws tuaj, nws tuaj txo dej txo cawv, ua nqaij ua hno, cuaj phaj yim taig, tsuas tias nqaij hno mas ncho lug xwb lauj! Nws niam yau muab tau peb lub quav txhuas ntxiv rau cib pheej thiab hais rau cib pheej tias “kuv muab peb lub quav txhuas no ntxiv rau koj, tsis muaj dab tsi los tseg, thaum twg koj muaj dab tsis no koj muab ob lub quav txhuas los sib txhuam ces luag yuav ua tsis tau dab tsi rau koj” ces nws niam yau rov qab mus lawm. cib pheej thiaj tso niam txiv pej xeem mus hu txiv huab tais tauj noj mov, lawv mus hu los txiv huab tais tsis tuaj li, cib pheej mus hu los tsis tuaj li thiab, nws rov los txog tsev nws txawm hais tias “tam tseeb tsis tuaj los puam chawj, tsam no nqaij hno siav ncho lug li no lawm tuaj tsawg leej los noj mus li tsam nqaij hno tsis zoo noj lawm”

Lawv noj tag lawv pw ib hmos tag kis kaj ntug txoog, cib pheej sawv los tu nra tas, cib pheej hais rau sawv daws tias “kuv txiv huab tais siab phem rau kuv kawg, tab sis tsam no kuv ua huab tais nyob saum ceeb tsheej lawm kuv yuav rov mus lawm saum kuv lub tsev”

Cib pheej thiab ntxawm nkawv thiaj ya ntxiag mus qhib khiag tus txiv nees tawm plaws los, nkawv caij kiag ya plaws qaum ntuj lawm, cib pheej mus kav yim feem teb nyob puag qaum ntuj tsis muaj tag.