Tus Ncej Tas

Tus piav: Vaj Xeeb Xyooj

Tus sau: Yaj Xyooj

Pub… Thaum ub ov... muaj ib tug yawg hmoob nws yuav tau ob tug poj niam, tus niam hlob yug tau ob tug tub hos tus niam yau yug tau tub coob dua ces tus yawg hmoob  ntawv thiaj hlub tus niam yau tshaj.

Tus yawg hmoob ntawv tsis hlub niam hlob li lau vim tus niam hlob yuav los tau ntev ces laus lawm hos tus niam yau ces tseem hluas thiab tseem zoo nkauj, luag hais tias tus tshiab zoo tshaj tus qub ces thiaj ua rau nws tsis hlub tus niam hlob.

Tus yawg hmoob ntawv xa lawv 3 niam tub mus pob teb rau pub tom hav zoov loj deb deb ntawm zos, cab npua, nqa qaib mus rau lawv zov, luaj teb loj loj dav dav rau lawv zov. Lawv 3 niam tub nyob nyob tom teb tau ntev xyoo ua rau tus tub hlob twb loj tiav hluas, nyob txog tav no tus yawg hmoob ntawv yeej tsis tuaj xyuas lawv cov niam tub li.

Muaj ib hnub lub caij ntsuag xyoob tuaj tuaj tus tij laug tsawm hais rau tus kwv hais tias: “kwv ntxawg! koj ev kawm es wb mus dam ntsuag xyoob los ua noj seb”, ces nkawv ob kwv tij tsawm mus dam ntsuag xyoob pug pem kwj ha lawm. Nkawv dam tau ntsuag xyoob txaus ev los ces tus tij laug tsawm hais rau tus kwv tais: “kwv ntxawg! Koj ev kawm ntsuag no mus rau niam neb ua noj nawb, neb nyob es neb sib sib hlub mog, kuv mus yog hais tias kuv lub neej zoo lawm no ces kuv mam rov qab los hlub niam neb dua nawb, hos yog kuv mus es lub neej tsis zoo ces ntshe wb tsuas sib pom li no lam xwb”  hais tas ces tus tij tsawm raws dej nqis hav mus lawm  ces tus kwv ua ib siab quaj quaj ev kawm ntsuag los rau tom teb lawm.

Tam sim no tshuav nkawv ob niam tub ntsuag ciaj zov teb lawm xwb lau! Nkawv nyob ua teb, tu nkawv tej npua tej qaib. Nkawv nyob nyob tus tub ntxawg twb loj tiav hluas nraug lawm tab sis tus yawg hmoob ntawv yeej tsis tuaj saib tuaj xyuas nkawv ob niam tub seb nkawv nyob li cas li. Nkawv txom nyem heev vim nkawv nyob deb zej zog,  nkawv lub zos ces tsuas yog hav zoov loj, nas noog, qaib npua nrog nkawv nyob xwb. Nkawv tu tau nqaib tau npua los nkawv twb tsis pom qab coj mus muag qhov twg li tsuas yog tua noj xwb.

Hais txog tus yawg hmoob ntawv mas nws tau zoo nrog nws niam yua nyob tom zos thiab nws twb hnov qab nws 3 niam tub ntsuag ntawv lawm.

Nyob li ntawm tus tij laug ces nws mus yuav tau ib tug poj niam thiab nkawv lub neej zoo lawm, nws muaj ib tug niam hluas ces nws thiaj kom nws tus niam hluas los yuav nws tus kwv, nws hais rau tus niam hluas tias: “koj raws tus dej no nce toj lawm pug pem hau dej yog koj pom tus txiv neej zoo li cas los koj yuav nws nawb”, ces tus niam hluas thiaj nce raws dej tuaj mus raws tus txiv laus qhia.

Nkawv ob niam tub ua teb tav su ces tus tub tsawm mus nqa dej los ua su noj, nws mus txog tom hav dej na has ua cas pom ib tug hluas nkauj nyob tod, tus hluas nkauj hais rau nws tias: “kuv los yuav koj thiab los tsa koj lub neej”. Ces nws thiaj coj tus hluas nkauj ntawv los tom teb. Zaum no tau nyab lawm ces leej niam thiaj hais rau tus tub tias: “me tub! zaum no koj yuav tau poj niam lawm txawm phe thiab zoo los koj yog koj txiv ib leeg tub es koj rov qab mus sab laj rau koj txiv seb koj txiv hais li cas?”. Thaum niam hais li no ces nws thiaj li rov qab los tom zos, los sab laj rau leej txiv.  Tab sis thaum los txog tom zos leej txiv tsis kam nta, leej txiv hais tu lus nrho rau nws tias: “kuv yeej tsis nta neb ob kwv tij ntawm koj kiag nawb, kuv yeej tsis xam muaj neb ob kwv tij ntawm neb tias neb yog kuv tub lawm nad koj puas paub?”  Thaum zoo li no ces nws thiaj rov qab mus tom teb yam tu siab nrho lawm.

Thaum nws tus poj niam paub tias leej txiv tsis kam nta lawm ces nws poj niam thiaj hais rau nkawv ob niam tub tias: “txawm tias txiv tsis kam nta los kav liam, neb nrog kuv mus es kuv mam li hlub neb”. Ces lawv thiaj li sau nra los lawm, thaum los txog nram tus poj niam zos na has ua cas ho pom tus tij laug nyob nrav. Nkawv ob kwv tij rau rau siab txhim kho nkawv lub neej ua rau nkawv muaj thiab nkawv lub neej zoo dua qub lawm.

Nkawv nyob tau 3 xyoos ces tus tij laug hais rau tus kwv tias: “ab! Kwv ntxawg tau ntev lawm es wb mus saib txiv yom”. Nkawv tuaj saib txiv zaum no nkawv cab tau 9 tug nyuj 9 tug twm thiab tub mab tub qhe coob nrog nkawv tuaj. Nkawv tuaj thov so ntawm txiv thiab niam yau tsev,  nkawv hais rau txiv tias yog nkawv tuaj ua lag ua luam xwb. Txiv lub tsev me me ces nkawv lam pw ib hmos. Tag kis kaj ntug ces nkawv txib tub mab tub qhe mus txiav xyoob txiav ntoo los ua tsev rau txiv nyob, thaum nkawv ua tau tsev lawm ces nkawv thiaj los tua nyuj tua twm noj nkawv mus caw teb caw chaw tuaj nrog noj coob coob tas zog.

Thaum nkawv ua nqaij ua hno siav tag ces nkawv thiaj hais dej los ntxuav txiv thiab niam yau taw ces rub nkawv mus zaum sab pem toj. Lawv noj nqaij haus cawv mus ib chim zoj ces nkawv ob kwv tij thiaj haus ib zeeg cawv tshab plaws thiab qhia tias nkawv yog txiv ob tug tub uas txiv muab xa mus pob teb. Thaum no ces leej txiv lub kua muag poob nthav ces leej txiv thiaj hais tias: “ob tug mi tub! Txiv xav tsis txog tias txiv ob tug tub yuav muaj hnub no, ntshe yuav ua tsis tau ib pluag li no rau txiv noj li no li, ob tug mi tub yav tag dhau los zam txim rau txiv nawb”, ob tug tub teb tias: “tsis ua cas os txiv! txawm li cas los wb twb muaj nyab tag lawm es koj ho tsis txhob txhawj thiab”.

Nkawv ua nqaij rau txiv noj tag ces nkawm kom txiv nrog nkawv mus tab sis txiv tsis kam mus vim txiv tseem tshuav niam yau thiab nws cov tub coob coob.

Nyob nyob muaj ib hnub leej txiv xav xav tau ib lub tswv yim ces leej txiv tsawm hu niam hlob thiab niam yau cov tub tuaj ntsib, nws hais tias: “ab! Cov me tub kuv ua nej txiv los laus li no kuv tsis tau thov nej ib yam dab tsi li, yog li hnub no kuv xav thov nej cov ua tub mus txua ib leeg ib yam khoom dab tsi los rau kuv saib ua dab muag”.

Niam hlob ob tug tub los txog tsev ces nkawv los xav xav ces tus tij laug thiaj txua rab qeej vim nws xav tias txiv laus lawm tsam txiv kho siab es cia txua rab qeej rau txiv tau tshuab daws kev kho siab. Hos tus kwv ces nws xav tias tsam txiv khwv khwv niaj hnub mus ua teb es cia txua rab hneev rau txiv tau tua noog taug kev.

Thaum nkawv txua tau ces nkawv thiaj nqa mus rau txiv, txiv pom dheev xwb ces txiv zoo zoo siab, txiv hais tias: “ob! 2 tug me tub neb mas thiaj txawj hlub kuv tiag tiag lau” ces leej txiv hais ntxiv tias: “ob tug me tub kuv yug tau neb los kuv twb tsis tau hlub neb li, yog li txhawm rau qhov neb hlub kuv ntawv thaum kuv tuag lawm kuv mam los ua tus ncej tas rau neb, los zov neb vaj neb tsev, zov neb tej me tub mi nyuam, tej tsiaj tej txhu, yog thaum twg neb muaj kev nyuab siab dab tsi neb hu kuv kuv mam los pab neb”. Txij li thaum ntawv los ces nkawv thiaj li teev tus ncej tas.

Cov hmoob uas muaj tus ncej tas ces yog ob kwv tij no cov xeeb zeej xeeb ntxwv.