Hmoob Lawb Dab Hlawv Hmoob Rab Qeej

Tus sau: Yaj Xyooj

Raws li xov xwm hauv Hmoob TV tau tso ib daim video hais txog cov hmoob lawb dab muab ib rab qeej nrog rau cov twj neeb thiab rooj neeb hlawv, daim video no tau post rau hauv Youtube hnub tim 3/1/2016.

Nyob hauv daim video no yog muaj ib tus txiv plig muab lawb dab rau ib yim hmoob es mus muab nws rab qeej uas nws coj mus tshuab pab peb haiv hmoob lub ntees coj los hlawv thiab muab nws tej twj neeb thiab lub rooj neeb hlawv pov tseg.

Tus thaij daim video no nws tseem hais tias rab qeej no yog rab nrhiav noj nrhiav haus, qhov lus no ntxim li tsis zoo mloog pes tsawg.

Rab qeej no peb hmoob siv ua dab tsi? Tsis yog siv ua chaw nrhiav noj nrhiav haus li nws tau hais. Rab qeej no peb siv thaum muaj ib siab ob qig, yog kev pab tsev neeg uas tab tom muaj kev ntxhov siab. Dhau no ces yog coj mus dhia qeej ua kev lom zem thiab qhia rau neeg ntiaj teb paub tias “yog leej twg muaj rab qeej no ces tus ntawv yog hmoob”.

Dab tsi thiaj qhia tias peb yog hmoob? Lus hais, tsoos tsho, rab qeej, raj thiab ncas. Tab sis tsam no raj thiab ncas tsis tshua pom muaj lawm tsuas hnov cov qub uas tau kaw cia tseg lawm xwb. Yog tias rab qeej no tseem raug muab hlawv li no thiab ces ntshe hmoob tej puav pheej tag lawm tsuas tshuav tsoos tsho thiab lus hais lawm xwb. Yog tseem muaj ib co hmoob zoo li no thiab tsis ntev ces twb yuav tsis paub hais lus hmoob thiab yuav tsis muaj khaub ncaws hmoob lawm, thaum ntawv puas yuav muaj hmoob nyob hauv lub ntiaj teb no ntxiv lawm ned?

Txoj kev ntsheeg, leej twg yuav ntseeg dab tsi los yeej tau, tab sis tsis txhob muab txoj kev ntseeg ntawv los faib tshem thiab cais peb hmoob txoj kev sib hlub. Kuv tsis nkag siab hais tias ua cas cov lawb dab es yuav los cais los faib tshem cov tsis lawb dab li no? Txoj kev ntseeg tsuas yog ntseeg kom kaj siab xwb, thiab yog yus ntseeg lawm yuav ua rau yus kaj siab.

Txhua txoj kev ntseeg tsis tau qhia kom ua neeg phem, tsuas qhia kom sib hlub xwb, tab sis kuv tsis nkag siab hais tias ua cas cov mus ntseeg vaj tswv es siab me ua luaj thiab nyiam cais cov tsis kam mus ntseeg vaj tswv ua luaj.

Yog vim li cas Yesu thiaj ua siab nyoo cia lawv muab coj mus tua yam txom nyem ua luaj? Txhua yam vim xav kom cia nws ib leeg nqa txoj kev tsis ncaj ncees thiab kev sib faib tshem no mus es cia txoj kev sib hlub nyob tom qab, tib neeg thiaj ntseeg nws tag npaum no. Tab sis ua cas peb hmoob ho tseem coj zoo li pug thaum Yesu tseem nyuam qhuav yug es muab tib neeg sib cais ua cov ntseeg thiab cov tsis ntseeg. Cov ntseeg yuav muab txhua yam yog hmoob puav pheej pov tseg, muab hlawv pov tseg.

Nyob teb chaws nplog tseem muaj txoj kev txaj muag tshaj no, cov ntseeg faib kiag tias cov ntseeg tsis koom nrog cov tsis ntseeg, muaj ib siab ob qig, kev noj haus, kev tshoob kos, kev cai dab qhuas.

Kev neej kev tsav kev kwv kev tij raug cais vim txoj kev ntseeg nyob Nplog teb, tus dab laug yog huam nab church hos tus yawm yij yog cov coj dab, tus dab laug yeej tsis kam mus koom tus yawm yij ib pluag mov li, txawm yuav muaj kev hu plig, ua neeb, ua mov nplej tshiab no los tus dab laug yeej tsis mus koom li. Puas tu siab ib tsoom hmoob? Txoj kev ntseeg tsis tas yuav sib faib npaum no.

Ib yim hmoob, tus txiv yawg txawj ua neeb tab sis tus nyab yog neeg ntseeg. Yog tus nyab nyob hauv tsev ces tus nyab yeej mob li mob xwb ua tsis tau dab tsi, nws hais tias tus txiv yawg yuav tsum muab tej twj neeb thiab thaj neeb pov tseg kom tag mas nws thiaj tsis muaj mob, ua rau lawv tsev neeg tawg tag, tus tub nrog tus nyab mus nyob ib qho tsis nrog nws txiv nyob lawm.

Cov ntseeg lawv xav kom lawv cov tub cov ntxhais tau yuav cov ntseeg ib yam, tsis xav pub mus yuav cov tsis ntseeg ib yam lawv.

Zoo nkaus li txoj kev ntseeg no yuav yog qhov los cais peb txoj kev sib hlub hauv peb lub neej hmoob mus lawm tiag.

Nco ntsoov hais tias txoj kev ntseeg yeej zoo tshaj lawm, tiam sis tus neeg coj mus qhia lwm tus ntawv yog tus qhuav tshem txoj kev ntseeg zoo zoo ntawv.

Txawm yuav ntseeg dab tsi los xav kom peb tseem sib hlub sib pab, tsis hais muaj ib siab ob qig, muaj noj muaj haus peb yuav tsum mus koom tsis txhob faib tias koj tsis ntseeg kuv tsis kam mus.