Npua Dab Roog

Tus piav: Yawg Tsav Ntxw Xyooj

Tus sau: Yaj Xyooj

Thaum ua Npua Dab Roog mas tsis pub hais lus nplog thiab tsis pub nqa nqaij mus noj nraum zoov los sis muab nqaij ntim su rau tej txheeb ze los sis tej muam phauj dab laug, tej nkauj tej muam thiab tej kwv tej tij.

Peb txooj hmoob xyooj no yog niam yau yug, tus niam yau no yug tau 5 leeg tub. Thaum ntawv nws tsis muaj npua yog li nws thiaj mus nyiag tau Nplog ib tug npua los ua dab roog, nws muab tus npua tua faib ua 5 txig rau nws 5 leeg tub ces tam sim no tus npua dab roog peb thiaj muaj 5 txig xwb.

Thaum ub mas poj niam mus nyiag Mab tus npua los ua dab roog, yog li poj niam thiaj tsis pub txiv neej noj nqaij ces poj niam muab coj mus ua rau hauv txaj, tab sis poj niam tsis txawj tua thiab tseev npua ces poj niam thiaj kom txiv neej pab tseev tus npua tso mam muab cov nyhuv rau txiv neej noj. Ces tam sim no tus npua dab roog txiv neej thiaj tau noj cov nyhuv lawm xwb.

Vim yog poj niam mus nyiag tus npua los xwb thiab ho tsis xav pub txiv neej noj mas poj niam thiaj coj mus ua rau hauv txaj kom txiv neej tsis txhob pom, hos qhov tsis pub hais lus nplog tsis pub nqa nqaij mus noj nraum zoov mas vim yog poj niam mus nyiag Mab li npua los xwb es thiaj tsis pub ua li ntawv.