Keeb Kwm Xyooj Diav Nqeeb

Tus Piav: Yawg Tsav Ntxhw

Tus Sau: Yaj Xyooj

Xyooj diav nqeeb thaum nyob suav teb muaj 3 Kwv Tij Thiab 1 Tug Muam, 3 Kwv Tij no muaj npe xws li: 1). Yawg Vab xyooj (Yawg Liaj Vab) yog tus tij, 2). Yawg Zam Vwv yog tus nrab, 3).Yawg Lag Mim yog tus kwv.

Thaum nyob suav teb tau muaj teeb meem ntau tsav ntau yam tshwm sim tuaj yog li lawv thiaj li tau tsiv teb tsaws chaw. Yawg Vab yog ib tug neeg rog rog es los tsis tau ces nws thiaj nyob suav teb lawm, nws cov xeeb ntxwv paub dab tsis tag ces thaum lawv ua nyuj dab ces lawv tsis coj nyab los ua luag ces lawv cov nyab nrog lawv cov tub nyob tsis ntev ces tuag lawm, ces tshuav tib co yawg ntsuag xwb yog li lawv thiaj mus saib ces yog tim qhov ntawm no ces lawv thiaj mus coj dua dab tshiab lawm, tam sim no mas tseem nrhiav tsis tau laib pab kwv tij no. Hos yawg Lag Mim ces lawv qab los tiam sis los caum tsis tau yawg Zam Vwv ce tsis paub tias tam sim no xyov los nyob rau qhov twg lawm. Yawg Zam Vwv thiaj coj tus phauj los lawm. Yawg Zam Vwv coj tus muam los ces tsis pom yawg Lag Mim los caum tau, yog li yawg Zam Vwv nkawv thiaj li los rau nplog teb lawm.

Tam sim no yawg Vab cov xeeb zeej xeeb ntxwv mus nyob ib leeg ib lub teb chaws lawm xws li: nyob teb chaws nplog (Laos) yog nyob lub zos ບ້ານຕ້າເໜືອ, zos ສາມແຍກໜອງເປັດ, ເມືອງແປກ, ib co nyob lub zos thab huas lom (ຖ້ຳຫົວເຫຼົ່າ), ib co zos moos tas (ເມືອງຕັນ­), ເມືອງຄູນ, ແຂວງຊຽງຂວາງ, muaj ib cos los nyob rau zos ຄອນວັດ, ເມືອງລ້ອງຊານ, ແຂວງວຽງຈັນ.­ Dhau no muaj ib co mus nyob teb chaws America lawm. Xyooj diav nqeeb tsev neeg dhau los lawm 9 txheej neeg lawm nyob los tsuas teb xyoo 2009. 

Yawg Tsav Ntxhw hais rau kuv tias: “thaud yawg Txooj Vws hais tias peb nyob kom peb kav tsij mus nrhiav yawg Lag Mim cov xeeb zeej xeeb ntxwv los ua kwv ua tij es thiaj li muaj kwv tij ntau no”.

Xyooj diav nqeeb li kev cai dab qhuas uas ib txwm ua los luag hais tias “Poj ua Cia Yawm ua Tseg” yog muaj raws li nram no:

# Tus nyuj dab: yog 13 txig thiab 3 ntsau, yog Yawg tuaj yuav Nyuj ces yawg coj Nyab tuaj hos yog Pog tuaj yuav Nyuj ces pog coj Tub tuaj, peb txooj hmoob no yog tug nyuj tug dab xwb.

# Tus npua cawv: yog 5 txig ua rau ntawm tus ncej tas.

# Tus qaib cawv: yog 3 txig ua rau ntawm tus ncej tas.

# Tus dab roog: yog 5 txig ua rau hauv txaj thaum tsaus ntuj.

# Thaum tag sim neej lawm peb coj los pw xyab rau ntawm tus ncej tas, peb yog nees txais txhais tau tias nqa tus nees los qhov rooj tag los ces rov qab mus qhov rooj tag, yog hmob ntxa av (tsis txhim pob zeb), yog hmoob tawm nras, peb nqa tsais mus rau noj tom ntxa kom puv peb tag kis, txog thaum puv ib tsug 13 hnub mas peb tsis xi, yog npaj tau thaum twg ces cia li tso plig lawm xwb.

# Thaum tso plig peb tsis muaj lub ncuav nyob hauv lub kauj vab.

# Thaum tso plig muab tus dev los ntuas vij sub vij sw ntuas hauv tsev tawm mus uas yog ncig qhov cub 3 lwm mus 2 lwm los lawv tus txiv qeej qab tom qab ntawv ces coj mus tua rau tom lub rooj vag thiab muab khuam zov rau tov.

YOG VIM LI CAS HO HU PEB COV HMOOB NO HU UA “XYOOJ DIAV NQEEB”?

Nyob rau qhov no mas kuj tsis muaj tus hais tseeb tias yog vim li cas? Tab sis xav tias nyaj yuav yog li nram no:

Vim yog cov laus thauv lawv nyiam tsiv teb tsaws tshaw khiav ib qho rau ib qho thiaj ua rau lawv tej cuab yeej teem txoos ploj tag ib txhia ua rau lawv tej luaj kaub tais diav tsis txhua ua noj, yog li txog thaum noj peb caug ces lawv cov diav tsis txaus laig dab (daiv tsis txhua cov dab) vim cov dab coob tshaj cov diav lawm yog li lawv thiaj mus rho cov kav nqeeb coj los laig dab. Yog li ib txheej thiaj ua dhau ib txheej ib tis ua dhau ib tis ces sawv daws thiaj ua los txog rau niaj hnub tam sim no.

Vim yog peb txooj hmoob xyooj no muab kav nqeeb coj los ua diav laig dab rau thaum noj peb caug hnub xiab ib yog li thiaj muab peb txooj hmoob no hu ua “Xyooj Diav Nqeeb”.